LABOUR ROOM

Cheekti cillati ek mahila ne, mari labour room mein entry,

4 delivaries karke raat bhar, hum abhi abhi hue the free.

Ghadi mein ab baj rahe the, subah ke che,

Kul milakar hum teenon, bus 2-2 ghante soye the.

Colleague bola ‘let she not be dilated , oh dear lord!!,

We badly want to send her back to the ward.’

Doosri karne lagi p.v. pehen kar gown,

‘congrats friends, she is full, no time to frown!’

30yrs ki anuradha, G3P2, ANC thi regular,

no complications lekar history, rakh diya maine paper.

‘zor do’ ke naare lagaye humne, ab tha 2^nd stage of labour,

‘bearing down’ accha nahi tha uska, lagaya mere friend ne fundal pressure.

Humne hi zor lagaya aur ki uski delivery,

Labour room mein aayi, 2.5kg ki nanhi pari!

Cord clamp aur cut karke, humne rakha baby ko heater ke paas,

Acchi cry thi uski aur le rahi thi woh khul ke saans.

Uski moti thi aankhein, gulabi the gaal aur kaan,

Chotisi uski unguliyan dekhkar, mitgayi hamari thakan.

‘Ladki hui ya ladka?’ andarse anuradha chillayi,

main boli ‘ bacchi hui hai, tumhari chabi hai payi’

yeh baat sunkar, dukhi hokar, anuradha lagi rone,

bacchi ko dekar sister ke haat, gher liya usse hum teenon ne.

woh boli ‘ladka hone ki aas se, maine liya yeh teesra chance,

phir se ladki hui mere ghar, tooti har iccha, har aas’.

Hum bole ‘ ladka ladki mein phark mat karo,

Bacche toh hai prabhu ka vardan,

Teenon ladkiyonko, padhana-likhana,

Banana unhein accha insaan.’

‘Agar ladka hota’ boli woh , ‘aage chalata khandan ka naam,

dahej dekar bhejna padega teenon ko, nahi aayegi kisike kaam.’

‘arre hum bhi toh hain ladkiyan’ hum bole,

‘beti ban paida hui kisike ghar,

doctor banke humnein,

oonch kiya apne ma baap ka sar’

bacchi ko ab rakha humnein anuradha ke haaton mein,

bhooki thi woh, bhool gaye hum use apni baton mein.

Use dekh anuradha muskurayi, apne aansoon pochkar,

Doodh dene lagi use, apne seene se lagakar.

Tabhi humnein kiya usse tubectomy ka zikar,

Ghusse se dekha usne hamari aur, pher li apne nazar.

Khatam hui thi duty hamari, ja rahe the hum bahar,

Labour room ke saare cases, agle interns ko sonpkar.

Meri books aur meri bag leke, jab main ja rahi thi,

Ek baat mere mann ko ab noch ke kha rahi thi.

Doctor banane ka jhoota dilasa kise de rahe the hum,

Do waqt ki roti milna, jinke naseeb mein tha kam.

Main toh thi acche gharse, nahi hui mujhe paison ki kami,

apni tulna kar rahi thi un bacchon se, jala rahi thi jinhe bhook ki garmi.

Aur har bacchi ke saath paida hua woh , dahej ka rakshas,

Zeher gholta uss parivaar mein, daba raha tha unki har nass.

Aayegi zaroor agle saal anuradha, jab hogi woh chauti baar pet se,

Phirse ladka hone ki aas lagaye, apne due date se.

Kaise ro sakti koi ma, dekhkar apne haaton mein apni nanhi jaan,

Jabki who khud ek aurat hai, prapt hai sirf usko jeevan dene ka vardan.

Ek stree hone par hai mujhe garv, nahi mahsoon ki maine koi lachari,

Lekin sacchi khushi toh tab hogi, jab mitjayegi ‘SEXUAL DISCRIMINATION’ ki yeh bimari!!!!